Veertig jaar nadat Jannie ’n eerste Nederlandstalige liedjie plaaslik gesing het, is DE WALS VAN DE LIEFDE van Toon Hermans die titellied van sy nuwe program van persoonlike gunstelinge uit die Nederlandstalige kleinkuns van die twintigste eeu.

Jannie het van altyd af ‘n besondere aanklank by dié musiek gehad, en dit het sy musiek en loopbaan ingrypend beïnvloed. Daar is altyd versoeke vir sy “Hollandse” liedjies: Madeleine en Marieke van Brel, dié van sy vriende Jules de Corte en Robert Long asook Van Veen en Urbanus. Musiekliefhebbers kry nou die geleentheid om al Jannie se “toppers”, soos die Nederlanders sê, in een program te hoor. Jannie word op klavier en alt-saxofoon begelei deur die uiters musikale egpaar Marcel en Deryn Dednam.